Annecy - France

صيف ٢٠٢١ - فرنسا و سويسرا

نبدي في منطقه أنا احبها ، أنسي الفرنسيه ، في ناس ما تواطنها 😂 و في ناس من كثر ما تحبها تقعد فيها ٣ أيام بالفندق . تبعد عن منطقتنا نص ساعه تقريبا ، احنا قراب من جنيڤ ، فاذا كنتوا في جنيف راح تكون نفس المسافه ، أول ما نوصل نوقف في مواقف مجمع اسمه كوريير 

Courier 

ناكل كرواسانه أو كيكه و نمر چم محل قبل لا نطلع بره إلى المدينه القديمه و الحديقه. بالمجمع عندهم زارا ، اتش ان ام و سيفورا و جمعيه صغيره ، نتسوق ، نقط الاغراض بالسياره بعدين نطلع من المجمع ، باتجاه الحديقه يم البحيره ، فهودي كان ٣ سنوات فلازم عربانه ، راكان ٦ سنوات ، وده ندزه بعربانه بعد ، بس شكبره خل يمشي 😂 صوب البحيره اكو مكانين للالعاب ، وحده تسالني شلون الحمامات ، للاسف الحمامات مو وايد نظيفه ، فاحنا ندخل حمام المجمع قبل لا نروح لان يم الحديقه ماكو الا واحد ، اضطريت ادخل مع فهودي مره . السنه ودي نركب مركب صغير نسوق في بالبحيره

paddling boat

فهود لازم يلبس لايف جاكيت 🙈 

طبعا الجو لازم يكون براد وله مالكم خلق نفسكم ، في فيديو راكان يقول احترقت ايده من الالعاب الحديد . 

و بالرده للمجمع حق السياره نمر المحلات اللي بره قبل لا يصكون الساعه ٧ 

Max mara ، etam ، tara jermon ، maison de monde 

مال الاثاث و زارا هوم قبل لا يصكون الساعه ٧ 

منطقة ألعاب جدام محل ماكس مارا

ساعات نودي ويانا كره يلعبون فيها هناك

راكان سنه ٢٠٢١ ، عمره ٦ سنوات

أنا سنه ١٩٨٥ ، كنت ٧ سنوات تقريبا كبره 

العادات و التقاليد ، بوديهم كل مكان رحت له 😂😂

مطعم تايلندي ( ستريت فوود ) ، لقيناه بالصدفه 

Pitaya

 ما اجنن بس مقبول، أنا ما أكل لحم أو دياي فدايما أدور شي بحري أو بيتزا

 

ملاحظه: المطاعم أغلبهم يصكون الظهر الساعه ٢، فاحنا نغدي اليهال بالبيت عيش ابيض و دياي وله ربيان مقلي 

 المطاعم ترد تفتح  الساعه ٧ , حزتها احنا عيزانين بس نبي نرد ، ناكل ساعات برغر كينغ على الماشي ، او برد و خرابيط طول الطريج 

ملاحظه ثانيه: حمام المجمع بفلوس ، جهزوا الخرده ، اليهال ببلاش الكبار بفلوس

ملاحظه الثالثه : أنسي فيها مجمع 

Galeries Lafayette 

بس طبعا مو نفس مال باريس ، بس مجمع ملموم و حلو تلقون في شراشف ، اغراض بيت ، هدوم يهال ، هدوم كبار و كل شي تحت سقف واحد ، اذا طق مطر رحنا 

طبعا مع قوقل كل شي صار سهل ، بس كتبوا الاسم و امشوا على الخريطه