Blue Shampoo



أذكر من قالوا في احتمال بصير حظر كلي ، قلت خل ألحق و أطلب من صالون 
هذا الشامبو مثل الرنساج ، يشيل اللون البرتقالي بالشعرالمصبوغ أشقر
من زمان أسمع عنه و في بنات يستخدمونه بالبيت بس وله مره فكرت أشتري لأن أنا كل شهر أروح الصالون أصبغ الشيب و على الطريج يسوون لي رنساج ، بس مع الأوضاع الحاليه ، خلاااااص ماكو صالون ، كل شي بالبيت
دخلت سايتهم و طلبت الشامبو مع البلسم
بالسايت حاطين شرح لطريقه الاستخدام ، بس لما وصل الشامبو شوي اخترعت يوم قريت القرشه ، ان ديري بالج ، هذا للاستخدام بالصالونات و ان لبسي دسوس لما تسوين شعرج ، هذا مو مذكور بالسايت
قلت وي مالي خلق ادور دسوس بغسل في و اشوف النتيجه
وااااااي انصدمت من اللون ، ايدي صبغت ، لا صج احتاج دسوس ، أظافيري كلها صارت بنفسجيه
 كاتبين بالسايت ان اقدر استخدمه مره إلى ثلاث مرات بالاسبوع ، بس جنه لا ، الشامبو ينشف الشعر بشكل مو طبيعي ، ضروري وراه ماسك ، أنا بس حطيت البلسم مالهم 
  أول مره قعدت في خمس دقايق ، النتيجه حلوه ، صج راح الصفار ، في بعض الخصل ردت على اللون الرمادي المطلوب  و بعضها يبيلها وقت أكثر ، المره الثانيه ، بعد أسبوع ، زدت الكميه و قعدت في  تقريبا ١٠ دقايق - عديت الوقت المقترح  
بس صج يرد الروح
مو يقولون اهتمي بالصحه النفسيه
أنا هذا ريحني بهذه الفتره


 و في يوم من الأيام و أنا أتابع غدير قمبر على الانستغرام، وله أشوفها تمدح شامبو اسمه فايتو
No yellow shampoo
نفس الفكره يشيل اللون النحاسي بالشعر المصبوغ أشقر
وتمدح بمنتجاتهم ، أنا الصراحه ما أعرفهم ، بس ما شاء الله شعرها كان يلمع شحلوه ، قلت بس خلاص خل أجربه  ، طلبته من صيدليه الباديه بالواتس أب
50780557 
عاد حزتها كنا بالحظر الكلي ، بس لانهم صيدليه ، كانوا يقدرون يوصلون بالحظر
جربته ، كلش ما فرق معاي اللون بتاتا ، ما كان شي واضح ، و هم ينشف ، لان كلهم فيهم اللون البنفسجي ، فالشعر بينشف أول و تالي ، أهو مو للاستخدام اليومي ، مره بالاسبوع كفايه 
يمكن لو كنت توني مسويه شعري بالصالون و أبي أحافظ على اللون أوكي أستخدمه 


و بعدها بكم يوم أشوف صالون
يسإلون زباينهم شنو المنتجات اللي ما تستغنون عنهم 
وحده ردت و قالت ٣ منتجات من بينهم 
Matrix Blue Mask
أووووه صج
يالله نشتري
ما سمعت عن بلو ماسك من قبل
طلبت الماسك مع الشامبو ، الله يعافيها صاحبة الصالون حطت لي معاه البلسم هديه 
ااااااه ، اينن الماسك عجييييب
لان ماسك ، ينعم الشعر
كنت سعيده و أنا احطه لان أشوف اللون قاعد يقلب على رمادي
و كان صج لونه أزرق
اللي قبل كان لونهم بنفسجي
ملاحظه : أكو منه بنفسجي بعد
وايد حبيته و ناطره يمر أسبوع عشان أرد أحطه مره ثانيه
و صار عندهم سايت للطلب
ما شاء الله ، الكل وفر خدمة التسوق اون لاين ، وايد مفيده و اسهل للطلب
شاركونا تجاربكم
😆أنا جاهزه للطلب 

Comments

Popular posts from this blog

باي نومه لبستني

دراريع بأقل من ٥٠ دينار

The Black Ice Cream