عشانج يا كويت قاعد بالبيت




ما شاء الله
مرت ٣ أشهر أو أكثر من بدت الكرونا
آخر ذكرى لي بالحياه الطبيعيه أيام العيد الوطني ، و المجموعه إللي سويتها للعيد و السايت الخاص فيني اللي فتحته بهذه الفتره لعرض المجموعه ، من كثر ما كنت مشغوله ، ما مداني حتى أكتب عنه في البلوق ، لأن بس خلصنا من العيد الوطني بديت تصوير دراريع رمضان للبنات ، و مشتطه ويه كل وحده أصور لها و أتخيل لها نجاح باهر بمجموعتها
و تحوشنا الكرونا
وللأسف كل اللي صورته ما اقدر اشاركه الناس

اكتأبت
أدري ان ازمه و بتعدي
بس الواحد ما يدري شنو بصير بالأيام اليايه
 تأثرت وايد يوم شفت صور ايطاليا و شلون مستشفياتهم ما قامت تكفي المرضى
و شلون الفايرس قام يمشي من ديره لي ديره
 عفس الدنيا كلها
كلنا في حاله محد له خلق شي ، محد عارف شنو بصير
المدارس عطلت
المعارض تكنسلت
المجمعات صكت
الدنيا كلها وقفت
صار هدووووووووء
راحت أيام السرعه و جدول الالتزامات 



بدينا هني الدراسه بالبيت
مسكين فهودي تونا مدخلينه الحضانه , داوم اسبوع و الباجي غايب مريض ، ما شاف شي
و لما بدوا التعليم عن بعد ، أهو بو سنتين يدزون له واجبات أكثر من راكان بو خمس سنوات
يقولون علموا دعاء دخول الحمام
الولد ليما ألحين يلبس بامبرز أي دعاء ؟ من صجكم
طبعا ضحك ، راكان أهو يسوي واجبات فهودي و الثاني يطالعه





عدينا هذه المرحله و دخلنا رمضان
كان جدا غريب ما نتفطر عند اهلنا مثل كل سنه  بسبب الحظر الكلي
بس كان حلو و غير ، طبعا بدعنا بالطبخ
كل شي جربناه
الله يعافي يوتيوب
هذا اللي كان مونسنا و الوقت كان يطوف بسرعه منه ، نطبخ ، ناكل نخلص ، و بعدها نسهر بالليل ندور وجبه ثانيه لليوم اللي بعده 
الساعتين الي سمحت فيها الحكومه للمشي قبل الفطور ، صج كانت تونس اليهال شوي ، يلعبون بالدوارف او يمشون 


بالصوره راكان و فهد كل واحد لابس دشداشته مالت العام الماضي ، مقصمله

خلص رمضان ، و يوم العيد كشخنا و قعدنا نعايد بأهلنا بالفيس تايم
 و بعدها قمنا نعد الأيام ، ننطر متى نخلص الحظر الكلي
٨ أيام أقعد اشخط بالرزنامه ليما يا اليوم و صار الحظر الجزئي من الست الصبح لي ست المغرب

و أخيرا نقدر نطلع ، طبعا كل يوم في بيت أهلي
هني شوي تعدلت النفسيه و بدت الناس تستعد للدوامات و في بعضهم داوموا، و غير الناس اللي بالشاليهات و البحر
اتوقع الحين انسب وقت أشارك الناس المشاريع اللي صورتها ، لأن أغلب المحلات صاكه و اذا الواحد طلب منها يطولون على ما يوصلون ، و معظم الدراريع اللي صورتها تصلح حق بحر أو حق البيت
كل جم يوم بشارككم مشروع    

Comments

Popular posts from this blog

باي نومه لبستني

دراريع بأقل من ٥٠ دينار

The Black Ice Cream