الترخيص التجاري

قاعده أقرأ البوست اللي قبله عن التأمينات ، واااي ما أصدق ، كاتبته في شهر يناير ، الشهر اللي خذيت في المكتب و بدينا إجراءات الترخيص و التسجيل ، عبالي في شهر ٤ بكون خالصه كل شي ، بس طلعت لنا مشكله من ما ادري وين ، و خذت منا  شهرين على ما خلصناها ، بس ، بعدين صار وقت سفرنا ، ووقفنا الموضوع ليما نرد ، و أنا الحين في شهر ٩ توني مداومه بالمكتب ، بس ما خلصت اوراق تسجيلي كموظفه. بالكويت كل شي قصه

أنا الحين في مرحلة تسجيل المؤسسه بالتأمينات و تسجيلي كموظفه على هذه المؤسسه

النماذج المطلوبه مع الصور تقريبا ٢٠ ورقه ، شي مو طبيعي ، و طلبات سخيفه ، اي حطوا كل شي بورقه وحده و نوقعها 

لا ، لازم نخلص اوراقكم

عندكم موظف خليجي ؟ 

لا

اوكي وقعوا على هذه الورقه

لما  تجددون الترخيص أو تعدلون علي لازم تييبون لنا نسخه أوكي ؟

أوكي

وقعوا هني

قولوا والله ان راح تييبون نسخه اذا حدثتوا بيانتكم   

والله قلت ... بالورقه قبل

لا غير ، هذه ورقه ثانيه ، وقعوا هني

وقعوا

وقعوا
وقعوا

الطريج طويل 

 قالوا يبيلهم اسبوعين على ما تتسجل مؤسسه ابره بالتأمينات

و بعدها اروح الشؤون و بعدين دعم العماله

  من الأشياء اللي عطلتنا شهرين ، إن زوجي كان شريك في شركه ، و صكوها ، هذه الشركه عليها مخالفه ، و يقولون ما تقدر تسجل مؤسسه يديده إلا لما تشيل هذه المخالفه (الرمز) ، وشي كان سخيف ، موظف واحد غير كويتي طلع من الديره و و ما تم إلغائه بالملف ، ما ادري شلون . المهم بعد ما متنا زوجي شال الرمز و خلصنا ، و كان عنده آخر اجراء و يطلع ترخيص إبره ، و كان عند واحد من الموظفين بالتجاره ، زوجي يقول للموظف : خلصت ، شالوا الرمز مني

الموظف يرد علي : لا ما شالوا ، اطبع الورقه و شوف انه ما شالوه

و يطيعه و يطبع الورقه و يقوله شوف ماكو رمز

الموظف بكل حقد يطالع الورقه ، و بعدين يرد على شاشته بالمكتب و يطقطق على الكي بورد و يقول
ألحين في رمز

هاااااا شفي هذا؟؟؟؟

 ما تصدق الموظف اللي جدامك يتغشمر وله شنو؟

المهم حووووسه ، بالنهايه الواحد لازم يكون عنده صبر كبيييييييير

الكل يقول حطوا مندوب و فكوا عمركم

بس أنا ماشيه على ان الأمور تغيرت ، مو أهم اللي يقولون قلت الاجراءات و شغلك بخلص أسرع من أول ! منو يتوقع بصير جذي

والله ذكروني بمسلسل اسمه تقدير احتياج ، لاززززززم تشوفونه ، يمووووت من الضحك ، يصفون حاله الوزارات بالضبط

  صج صج هذا اللي يصير ، حتى الديكور ضابطينه و حركات الموظفات و مكاتبهم ، ما يتطوف

للأسف الموسم الأول بس ٤ حلقات

وآخر حلقه مو موجوده على يوتيوب ، نزلت برنامج 

Telly

على التلفون عشان اشوفهم كلهم