Me Blogging

الله يا أنا فرحت يوم شفت مسج من صاحبة مشروع 
Yarn by M
تطلب مني ان اصور مجموعتها للشتاء شغلها بسيط ونازك ، أحب هذا الستايل شفتوا لما يقولون  simple chic هذا ستايلها



المجموعه عمليه و تصلح حق كل يوم  و حق شتانا خصوصا ، البلوزات لاهي متينه وله وايد خفيفه ، شي يدفي و أحلى شي لبسي و طلعي


أكو منه اللون الأوف وايت و الأسود و القلبه تنشال اذا ما تبين تلبسينها

هذا البشت صج سمبل و شييك لو ألبس بشوت جان سيده خذيته
ماشاء الله العارضه طويله ، يوم لبست البشت طلع عليها قصير بس مع البنطرون الوسيع اللي لابسته كان حلو ، يلوق الواحد يطلع في طلعه عاديه مو بس يمعه بالبيت



Yarn by M دخلوا الأكاونت و شوفوا باجي المجموعه  و لا تنسون تحطونها بلستتكم حق رمضان الياي السنه اللي طافت أغلب شغلها سولد اوت ، حتى القماش خلص ما سويت عندها الدراعه اللي كنت ابيها

متابعيني على الانستغرام يدرون إني خذيت مكتب بالديره و شافوا تجهيزه ، في هذا البوست بحط الأماكن اللي عجبتني  بس ما تخدمني ، يمكن تفيد أحد محتاج

 من شهر ٩ العام الماضي و أنا قاعده أدور على مكتب بأجار معقول و مساحه تكفي إني أصور فيها و أخزن أغراض إبره البحث كان جدا صعب ، كان ودي في حولي عشان أكون قريبه من مدرسة ولدي ، بس للاسف ما لقيت بالسعر المناسب لي ، قلت أروح الجابريه ، نفس الشي ، كله  ٦٠٠ دينار بالشهر و فوق  ، رحت السالميه ، كان في مكتب اينن ، الاضاءه الطبيعيه خيال ، أتوقع مبين من الصور تحت . المالك يأجر الطابق كامل ، الطابق في ٣ مكاتب ، أذكر كنت أدق عليهم أكثر من مره أسأل عنه ، قلت يمكن يغير رايه ، ماكو فايده

سما الكويت العقاريه - 66662582



المكان الثاني اسمه شبابيك جدام سوق الجمعه ، عجبني وايد ، قريب من الأفنيوز ، عشقي الأفنيوز ، قلت حلو أمر المجمع متى ما خلصت من شغلي ، بس حسافه المكان تطلع علي رخصه محل مو رخصه مكتب

الظاهر كان في مشكله بالكهرباء ، توه موصلينها لهم الوزاره ، فدزولي مسج بهذه المعلومه مع صور حلوه للمكان
حق المهتم هذه ارقامهم
66566504
98788896







هذه صوره المكان (شبابيك) أ…

محل يديد توه فاتح بالديره إسمه  Objects
 فكرته إن الواحد ياخذ هديته من المحل يغلفها هناك بمحل الورد و ينتظر بالقهوه على ما تجهز الهديه، غير هذا ، فوق عندهم  مكان الواحد يقدر يسوي في دورات ، المحل في منتجات محليه وعالميه
محليه مثل وهج للمباخر ، برنتس باي ريم ، موكا لمنتجات السكرب




 يوم زرتهم بالمحل كانت توه واصلتهم شحنه من جناط  أوشماما


هذه الأكثر مبيعا ، جنطه الأكل  Best Seller Lunch Bag (made from waterproof paper) 


يشوق الفضي Gym / Vacation Bag

 وعندهم بعد مجموعه من منتجات معاد تصنيعها مثل فازات ، صواني و سلال تباع للمحلات بسعر خاص 

المحل يبين أوضح بالفيديو

حاليا المحل فاتح من الساعه  10:00 الصبح لي  7:00 مساءا  تعرفون وين قهوة أناناس ؟ خلوها على يمينكم و أمشوا لي نهايه الشارع - أهم في البنايه اليديده ، بنايه مباني
وهذا أكاونتهم على الانستغرام
Link


Sponsored Post

ودعنا سرير البيبي و إنتقلنا إلى سرير كبير 
راكان يوم شاف صورة فراشه القديم في الانستغرام ستوري أنا حاطتها و كاتبه عليها بنودع هذا الفراش ، ضاق خلقه ، و قام يبجي ، هل الانسان جدا حساس ، بدال لا يستانس على فراشه اليديد ، يبچي على القديم و يقولي خلي عندي بالدار لا تعطينه أحد ، حزتها كنا مزهبينه عشان ياخذونه لناس محتاجينه 
خلاص السرير صار صغير علي و كان ضروري ناخذ أكبر ،  بس المشكله لان داره كلها كبتات مايصلح نحط لها سرير في   Headboard هذا كان اضبط شي ، اللي يسمونه  Daybed و الحجم الانسب له كان من أيكيا ، قررنا و خذيناه ، بس يوم يينا بنختار الفراش (أو المرتبه) مالت ايكيا ، كانت جذا ضعيفه ، مافيها سمك بتاتا ، ما تصلح حق ياهل بينقز على الفراش نصحونا نروح البغلي ، تفصال ، لان مقاس السرير اصغر من العادي ، ٨٠ x ٢٠٠ سم دقيت على كل محلات الفرش قبل لا اروح البغلي ، ماكو جاهز ، صج لازم نفصل ورحنا البغلي و عندهم مجموعه زينه و كنا كلش بنحط الطلب ، بس قلت خل أمر الجريوي ، كاهو يمهم وااايد أحلى ، ما ادري عشان العرض مالهم ؟ صفهم مرتب مع شرح للفراش ، و القماش المستخدم للفراش وايد احلى من البغلي ، مع ا…

THUNA
كنت أقراها ثونا أو ذونا جان يطلع بعدين إسمها ثنى وهو الإثنان As in Pair A pair of Shoes و الاسم بعد يرجع حق الصديقتين إللي أسسوا هذا البراند الكويتي الفكره طلعت من حاجة البنات الى جواتي ممكن يلبسونها طول اليوم ، من الدوام الى غداء عمل الى طلعه مع الأصدقاء أو زوارة الأهل ، شي مريح و عملي و بنفس الوقت في تصميم ملفت . هذه المواصفات ما لقوها بالسوق ، فقرروا يسونها بروحهم . شي ناعم و بسيط ، مع فريق من المصممين في فرنسا اقدروا يترجمون أفكارهم الى تصاميم . وين  يسوونهم ؟ في أوروبا و تركيا
 أصحاب المشروع دزولي مجموعه من الجواتي عشان أوريكم شغلهم ، يمكن بعضكم شاف الستوري بالانستغرام ، تحت بحطلكم صور بسيطه لشنو كان بالستوري ، اذا عجبكم شي تقدرون تطلبونه من سايتهم
ShopThuna.com








Sponsored post

قاعده أقرأ البوست اللي قبله عن التأمينات ، واااي ما أصدق ، كاتبته في شهر يناير ، الشهر اللي خذيت في المكتب و بدينا إجراءات الترخيص و التسجيل ، عبالي في شهر ٤ بكون خالصه كل شي ، بس طلعت لنا مشكله من ما ادري وين ، و خذت منا  شهرين على ما خلصناها ، بس ، بعدين صار وقت سفرنا ، ووقفنا الموضوع ليما نرد ، و أنا الحين في شهر ٩ توني مداومه بالمكتب ، بس ما خلصت اوراق تسجيلي كموظفه. بالكويت كل شي قصه

أنا الحين في مرحلة تسجيل المؤسسه بالتأمينات و تسجيلي كموظفه على هذه المؤسسه النماذج المطلوبه مع الصور تقريبا ٢٠ ورقه ، شي مو طبيعي ، و طلبات سخيفه ، اي حطوا كل شي بورقه وحده و نوقعها  لا ، لازم نخلص اوراقكم
عندكم موظف خليجي ؟  لا اوكي وقعوا على هذه الورقه لما  تجددون الترخيص أو تعدلون علي لازم تييبون لنا نسخه أوكي ؟ أوكي وقعوا هني قولوا والله ان راح تييبون نسخه اذا حدثتوا بيانتكم    والله قلت ... بالورقه قبل لا غير ، هذه ورقه ثانيه ، وقعوا هني وقعوا وقعوا
وقعوا
الطريج طويل   قالوا يبيلهم اسبوعين على ما تتسجل مؤسسه ابره بالتأمينات و بعدها اروح الشؤون و بعدين دعم العماله

  من الأشياء اللي عطلتنا شهرين…

image source
من قدمت استقالتي و الكل يقولي لازم تسجلين بالتأمينات عشان ما تنقطع خدمتج ، اذا عندج شركه و لا مؤسسه سجلي عليها . إي عندي ، عندي بكله ، أبليكيشن حجز مواعيد و عروض الصالونات ، بعد اسبوع من الاستقاله و انا كل يوم بالتأمينات و اذا مو عندهم اتصل فيهم تلفون و اسالهم عن اي شي يطري في بالي . لما كنت بالقطاع الخاص ، كنت على الباب الثالث ، و على حسبتهم يبقى لي ٥ سنوات و أتقاعد ، أهو بالاصح يبقى ٣ سنوات و نص ، بس القانون البايخ يقول لازم اكمل ٤٥ سنه بالعمر ، مو بس ٢٠ سنه عمل
   اذا انا صاحبة العمل ، و هذا اللي بسجل علي ، و يسمونه الباب الخامس ، يبقى لي ١٥ سنه على التقاعد اووووولاه يالفرق يالله شسوي ، اسجل و بعدين اغير
 موظفين الحكومه ما أدري على أي باب يشتغلون ، فسألت رفيجاتي بالحكومه ، أنتوا على أي باب تشتغلون ؟ جان ترد علي وحده منهم ، على باب الظيم و الظلايم   وااااي مت من الضحك و الثانيه تقول أنا ما شفت وله باب كله داعمه بالطوفه و الثالثه تقولي شنو يعني ؟ كل باب شنو في ؟ الباب ، أهو القانون إللي ماشين علي ؟ فالباب الثالث قوانينه غير عن الباب الخامس ، عشان جذي كله يسإلون إنت على أ…