حياتي تغيرت

كل ما افكر ارد اكتب بالبلوق ، اتوهق ، ماني عارفه من وين ابدي
 صارلي اشهر و انا احاول ارتب الكلام بمخي عشان اكتب هذا البوست ، و مو راضي يطلع معاي شي
 ... بس الجمله اللي تتكرر و ابي اقولها صارلي فتره اهي هذي

أنا استقلت  

يمكن اغلبكم شاف بالانستغرام ان صار عندنا فرد يديد بالعائله ، فهودي الصغير
انا كنت حامل السنه اللي طافت و ما يبت طاري كلش لان ابي اعيش هذه الفتره
off line
 و بنفس الوقت وصلت لي مرحله لا تطاق في شغلي، اللي خلاني آخذ قرار الاستقاله ، وايد ناس حوالي متحسفين اني طلعت  ، و حسوا اني تسرعت ، بس القرار ابدا ما كان بيوم و ليله ، ثلاث سنين و انا اراجع هذا القرار . السنه اللي ولدت فيها راكان كان مفروض اترقى بس الترقيه ما صارت ، لان ولدت و خذيت اجازه مدتها تقريبا ثلاث اشهر ، اوكي صح يمكن معاهم حق . السنه اللي عقبها توقعت الترقيه لان وايد طورنا بالشغل و خليناه
automated
بس لا ، شلون نرقيج و انت ماخذه ساعتين رضاعه ؟
لحظه أنا قاعده اتقيم على الوقت و له على الشغل اللي قاعده اسوي ؟
حلوووو ، وايد حلو ، هذا و انا تقيمي عالي من اشتغلت لي هذه السنه الله يعين لو انا كنت سيئه؟ جان شنو صار؟
و يات السنه الثالثه ، انت حامل
يا سلام ، و لما اسولف حق البنات يقولون اي هذا القانون الغير مكتوب ، ميخالف بعد شنو تسوين
لا مو ميخالف
 انا ذبحت روحي بالشغل وما اترقى عشان انا أم ؟

و في بدايه السنه
2018
 شهر يناير
 ولدت

و كل يوم أسال نفسي ، انا شلون برد اداوم مع ياهلين؟
شلون كل هالحريم يابو ثلاث و اربع و خمس و ردوا يداومون
ارد ؟ و اجاهد ؟ واخلي ولدي لي الساعه اربع العصر و بعض المرات خمس
يسوه؟
و كل ما قرب الوقت و بتنتهي اجازه الوضع و القرار يصير اوضح و اوضح
ابدا ما يسوه  اني ارد اداوم ، لو كنت ماشيه بمسار وظيفي واضح و المعامله كانت زينه جان قلت ميخالف ، أكمل ، بس جذي بصيرلي اربع سنوات بدون تغيير بالمسمى و الدرجه
و قدمت استقالتي في شهر ٣
و الحين تقريبا صارلي ٨ اشهر من استقلت ، و الحياه جدا غريبه بالنسبه لي
صارلي ١٦ سنه اشتغل فشعور غريب بدون دوام ، بس الحين يا الوقت اسوي في إللي ابي و احب
كله يسألوني ، مستانسه ؟
ما اقدر اجاوب بسرعه ، مستانسه بس مع شعور غريب ، الحياه وايد غير
متحسفه ؟
كلش لا
هذا السؤال اللي اعرف اجاوبه بسرعه