و خلصنا أول أسبوع بالمدرسه بسلام

يوم التعارف

وصلنا المدرسه على الساعه ٩

طبعا لأن رحنا بعد الدوامات ، فكلش مو مقياس حق الزحمه

المهم ما كان أكو وايد أهالي ، يمكن كنا تقريبا ٥ عوايل ، بدت المدرسه تشرح شنو بسوون ووزعت علينا أوراق فيها البرنامج  و كل الأشياء التعريفيه ، متى نوصله المدرسه ، النظافه ، الأغراض المحتاجينها منه ، جدول الحصص ، الأكل ، و جذي

أنا بس عيني على كوكو بشوف شنو بسوي ، طبعا أول ما قعدنا سيده قال أنا بروح ، وين تروح تونا يايين ، دورتله لعبه و له تركيب ، أشوه بده يلعب و لها فيها ، بعدين و المدرسه تشرح أشوف بيده مثلث من خشب و مجابل واحد من الصبيان و يقوله هذا شنو ؟ الولد ساكت يرد يعيد علي هذا شنو ؟ الولد يرد علي،  شنو هذا ؟ و يقعدون جذي ، واحد يسأل الثاني لما تعب كوكو و قاله هذا دائره

لااااااا هذا مثلث كوكو ، تعلم الولد غلط 

و يرد يجابل ولد ثاني و يبله صوره حصان و يقوله هذا مووووووو موووووو

هووو أي مووو هذا حصان ؟ 

يالله بعد شنسوي موو موو

المهم مو مخترغ

بس خلصت شرحها المدرسه رحنا سجلنا اسم العائله الكريمه كلها عند الاستقبال عشان اذا احد بمر ياخذه ، اسمه موجود

 وين نروح ألحين ؟ الآفنيووووز

طبعا أنا مو مصدقه إني رايحه وقت دوام ، قلت خل أتخيل نفسي مستقيله و أروح أخلص مشاويري الصبح

أأأأه حياة ثانيه ، إللي كنت أسوي بثلاث أيام خلصته بيوم

أنا ماخذه يومين إجازه عشان أكون ويه راكان  

فاليوم الثاني لازم أسوي تدريب ، متى نقعد؟ يمديني أوصله المدرسه و بعدين أروح الدوام بالوقت ؟

 للأسف فشلنا في إن نطلع قبل الساعه ٧

طلعنا الساعه ٧:١٠ ، و إنصدمت من الزحمه ، شي خياااال ، هذا بعد ما بدوا كل المدارس ، شنو بصير الأسبوع إللي بعده  ؟ الطريج إللي كنت مدربه علي بروح منه حق الدوام غيرته

رحت الدوام بعد ما قطيت كوكو و ما وصلت بالوقت وله شي ، باجر ضروري نطلع قبل

المهم بعدها دقيت على ريلي ، أقوله عن كوكو شلون دخل الصف و كان مستانس لما رحبوا في وينادونه كوكو ، قالي باي باي 

و له حتى إلتفت علي

أشوه الحمد الله

وبدينا أنا و ريلي نجيك على الجدول إللي معطينا إياه ، آلحين كوكو قاعد ياكل ، آلحين عنده فرصه ، ألحين العربي ، و بنفس الوقت قاعدين نسوي ريفرش حق البرنامج إللي قالت لنا المدرسه نزلوا على تلفوناتكم 

و بعد ساعتين تقريبا نزلت صور للصف و فيديوات ، طرنا من الفرحه إن نقدر نشوفه ألحين 

و هاذا حالنا طول الأسبوع

كل شوي مجيكين على البرنامج ، و الحمد الله شكله مستانس و قاعد يلعب مافي شي

توقعت لما يرد من المدرسه بنام من التعب ، لأ طبعا ، ينطر اختي تيي يقعد معاها بعدين ينطرني أنا آخذه و ينام بالبيت على ال ٤ 

صار هذ الجدول ، و تدريجيا ينام بالليل الساعه ١٢ بعدين ١١ و وصلنا ١٠:٣٠ بس مو أبجر من جذي ، المحاولات مستمره بس خل نتأقلم كلنا للوضع اليديد

الغريب ، صار بالبيت دلوع أكثر ، بس يبجي على أقل شي ، مادري من المدرسه ؟ وله أهو كبر خلاص و صار يفهم

الشي الثاني ،  فكنا من الزومبي كان غرامه الزومبي شوي نساه و بده يرد حق برنامج الأحرف ، إظاهر يذكر شنو عطوه

خل نشوف الايام اليايه شنو بتغير فيه