Posts

Showing posts from December, 2016
modaoperandi.com

تجديد رخصة بكله - الجزء الثالث : وزارة الإعلام

Image
و تستمر رحلة تجديد رخصة مؤسسة بكله اليوم توقيع وكيل وزارة الإعلام في منطقة شويخ الصناعية أول مره أدري إن الوزارة عندهم مبنى هناك طبعا أنا ما راح أشوف الوكيل ، أعطي السكرتاريه الطلب و أهم يوقعونه و يدزونه لمكتب الوزارة الثاني في الحكومه موول وجذي إفتكيت من المشاوير إللي مالها معنى و يبقى أرد حق وزارة التجاره ، المدنيه و آخر شي غرفة التجاره هذول كلهم في الحكومه مول Note to self تجديد الرخصه كل 4 سنوات تجديد وزارة الإعلام كل سنتين


عاد و انا بالطريج أدور الوزاره شفت مبنى كبييير و شكله يديد طلع المبنى للهيئة العامه للبيئه أنا يمكن أول مره سمعت فيهم كان في مجمع 360 مسوين بووث يثقفون الناس عن شغلهم و البيئه هذا موقعهم حق إللي يبي يعرف أكثر عنهم Link

تجديد رخصة بكله - الجزء الثاني : روحي الشويخ

Image
بدعوا ، بدعوا الوزارات بإجراءاتهم لعبه مو تجديد أوراق لعبة و فيها مراحل عشان أوصل حق الرئيس الأخير و أنا سوبر ماريو اليوم توقيع وزارة الإعلام ليش الإعلام ؟ لأن بكله موقع يعلن عن عروض الصالونات المشكله أنا مار علي كل هذا قبل ، شلون نسيته ؟ و معقوله بعد 4 سنين ليما ألحين نفس الإجراءات ، ماكو شي تطور ؟ المهم ، رحت اليوم برج التحرير – حكومه موول إللي مفروض يخدمنا بكل شي و ما يحتاج نفتر رحت حق وزارة الإعلام ، أول ما قلت للموظفه تجديد مؤسسه ، سيدة ردت علي بشويخ ابتسمت و قلت لها : مو معقوله ، ليش مو عندكم ؟ الموظفه: لازم يوقع عليها الوكيل أنا: من صجج ؟ شدعوه الوكيل بطل بالورقه وله يدري شنو مكتوب فيها ؟ ليش ما عندكم سستم بدال هالفراره تحولت إللي العميل المعصب إللي الموظف يسكت عشان يسمعه و يرد يقوله نفس الكلام أنا بروحي مت على ما لقيت موقف ، و يوم وصلت تقولي روحي شويخ؟! و قالت لي إنت أول ما سويتي تسجيل نفس الشي ، رحتي شويخ و ياتنا الورقه هني و انت إستلمتيها ليش ما أذكر كل هذا؟

تجديد رخصة بكله - الجزء الأول

Image
شي شي خيال إجراءات تجديد الرخصه
السنه خلصت رخصة بكله، قلت بسيطة ، أروح حكومه موول و أجدد الرخصه
أنا عبالي أروح ادفع فلوس حق التجديد و أطلع ، أت ح لم
إجراءات التجديد نفس إجراءات التسجيل
روحي التجارة
التأمينات
المدنيه
البلديه
الإعلام
وردي مره ثانيه التجارة
أنا محد حارني إلا الطباعين ، مالهم سالفه ، من صجهم ؟ روحي حق الطباع عشان يطبعلج الطلب ؟ شنو هذي المهزله ، إحنا ألحين كل شي اونلاين و إيميلات ، ليش ما تشيلونهم ؟
كل ما رحت حق جهة قالولي ردي حق الطباعين

المهم اليوم الصبح رحت البلديه بالفروانيه ، لأن المحل المؤجر يتبع الفروانيه ، و توني راده من هناك و مو مصدقه إللي مريت في ، كل هذا بس عشان تغير عنوان المحل المؤجر ، باجر لو أحد يسألني شنو الإجراءات إللي سويتها ما راح أذكر
modaoperandi.com