modaoperandi.com

تجديد رخصة بكله - الجزء الأول



شي شي خيال إجراءات تجديد الرخصه

السنه خلصت رخصة بكله، قلت بسيطة ، أروح حكومه موول و أجدد الرخصه

أنا عبالي أروح ادفع فلوس حق التجديد و أطلع ، أت ح لم

إجراءات التجديد نفس إجراءات التسجيل

روحي التجارة

التأمينات

المدنيه

البلديه

الإعلام

وردي مره ثانيه التجارة

أنا محد حارني إلا الطباعين ، مالهم سالفه ، من صجهم ؟ روحي حق الطباع عشان يطبعلج الطلب ؟ شنو هذي المهزله ، إحنا ألحين كل شي اونلاين و إيميلات ، ليش ما تشيلونهم ؟

كل ما رحت حق جهة قالولي ردي حق الطباعين


المهم اليوم الصبح رحت البلديه بالفروانيه ، لأن المحل المؤجر يتبع الفروانيه ، و توني راده من هناك و مو مصدقه إللي مريت في ، كل هذا بس عشان تغير عنوان المحل المؤجر ، باجر لو أحد يسألني شنو الإجراءات إللي سويتها ما راح أذكر

بكتبها هني حق نفسي ، جوود بعد 4 سنين لما نرد نجدد هذا كله يكون متغير

أول ما وصلت سألت الاستقبال وين أروح في طلب التجارة

المكتب إلي بآخر الممر على اليسار

و تيتسم المره و أبتسم لها في بالي هاذي الوحيده إللي بتعامل معاها

كتبت شي على الطلب و قالت لي روحي حق الطباعين

لاااااااااااا

ما احب الطباعين

رحت طبعوا طلب و قالولي روحي حق المهندس

رحت و رسملي مربع و كتب رقم علي ، أتوقع هذا المحل

بعدين المكتب إللي يمه ، فتح درج ، طلع منه أوراق و كتب شي على ورقتي

قالي ردي حق المهندس يعدل الرقم إللي كتبه ، بدال 1 خل يكتب 7 + 8 ، يا أخي أنت عدل!!!!

بعدين عند المدير وقع الورقه و ختم عليها

بعدين عند الطباعين لطباعه نسختين ، ما طليت فيهم لأن ما راح أفهم هاذي الإجراءات اللي مالها داعي

بعدين المكتب الي يم المهندس إللي ما أدري حق شنو

بعدين السجل عشان يكتبونه بالدفتر الكبير

بعدين الطباعين لتصوير الأوراق (الرخصه القديمه / البطاقه المدنيه / سند قبض الايجار / الرقم الآلي للمحل)

بعدين السجل مره ثانيه عشان ياخذون النسخ إللي صورتهم


جذي خلصت ؟ أروح ؟

إي ، ردي حق الجهة إللي ييتي منها

التجاره ؟

إي بس مو اليوم ، روحي باجر عشان يمدينا نسجلها

حلو

رحلة اليوم كانت 40 دقيقه

 
و يستمر العذاب ، باجر عندي وزارة الإعلام بعدين التجاره و أتوقع المدنيه

 أوووه نسيت

عقب كل هذا غرفة التجارة

Comments

modaoperandi.com

Popular posts from this blog

باي نومه لبستني

و خلصنا أول أسبوع بالمدرسه بسلام

و نودع أيام السهر