محد قام يلبس بامبرز

نكمل بوستات : تجاربي مع مشتريات البيبي

 

احنا نسمي الحفاضه بامبرز ، مثل ما كلنا نسمي المحارم الورقيه كلينكس ( حسيت نفسي المناهل ) ، فبس ما يبيله ، حفاضات البيبي من ماركة بامبرز

( لا مو زين ) الكل يقولي ، و أنا مستغربه ! مو زين ؟ هوووو شنو اللي مو زين ، حتى بامبرز ما أعرف اشتري بروحي !!

هذا بعد في استشاره ؟؟؟!!!

 أذكر بأول طلعه لي مع رفيجاتي للتجهيز حق البيبي ،  ياني انهيار عصبي ، قعدت بنص موثر كير بس اهاوشهم ( من صجكم ؟ من صجكم احتاج هذا ؟ و هذا ؟ و هذا؟ ) مساكين يقولولي احنا فاهمين وضعج ، هرمونات الحمل مخليتج عصبيه ، أي هرمونات ، إلا العقل مو مستوعب ، أشياء واااااايد يحتاجها البيبي و أنا ما أعرف ابسطها

المهم ، ماركة بامبرز ، يسوي حساسيه حق اغلب اليهال ، و يتلف ، على حسب كلامهم ، كلش مو زين . الانواع الزينه ، هغييز و ليبيرو 

Huggies

Libero

جربتهم ، أثنينهم زينين ، بس انا استقريت على ليبيرو

على فكره ، اذا تبين تعرفين البيبي بلل حفاظته ، في خط اصفر من جدام ، يصير ازرق اذا مبلله 

شفتوا التكنولوجيا 

بالعذر بامبرز كله دعايات بالتلفزيون ، طلع محد يستخدمه . آه يا القهر ، حتى ربع ريلي يعرفون اكثر مني ، واحد يقول حق ريلي ، لا بامبرز كله نايلون ، يحرق بشرة البيبي

تدرون عاد انا عندي ايميل اسمه بمبوره

Pampoora

 يعني بامبرز

 

أذكر مرت خالي كانت لما بتغير حق عيالها تقولهم يالله تعالوا چينج بمبوره ، عاد بعدها سافروا امريكا يكملون دراستهم و عيالهم و ياهم ، و كانت كنكته لهم ، ان بوريهم الكلمه معلقه في مخي ، سويت ايميل بهذا الاسم ، بمبوره ، و كان أول ايميل ادزه من هذا الحساب لهم ، عشان يضحكون . 

بذمتكم هذا اسم ؟ 

و لا أبشركم ، الايميل لي ألحين موجود ، و كل الشركات العريقه ادزلي علي  

ملاحظه : السالفه يمكن صار لها ١٧ سنه