Me Blogging

نكمل بوستات : تجاربي مع مشتريات البيبي   احنا نسمي الحفاضه بامبرز ، مثل ما كلنا نسمي المحارم الورقيه كلينكس ( حسيت نفسي المناهل ) ، فبس ما يبيله ، حفاضات البيبي من ماركة بامبرز ( لا مو زين ) الكل يقولي ، و أنا مستغربه ! مو زين ؟ هوووو شنو اللي مو زين ، حتى بامبرز ما أعرف اشتري بروحي !! هذا بعد في استشاره ؟؟؟!!!  أذكر بأول طلعه لي مع رفيجاتي للتجهيز حق البيبي ،   ياني انهيار عصبي ، قعدت بنص موثر كير بس اهاوشهم ( من صجكم ؟ من صجكم احتاج هذا ؟ و هذا ؟ و هذا؟ ) مساكين يقولولي احنا فاهمين وضعج ، هرمونات الحمل مخليتج عصبيه ، أي هرمونات ، إلا العقل مو مستوعب ، أشياء واااااايد يحتاجها البيبي و أنا ما أعرف ابسطها المهم ، ماركة بامبرز ، يسوي حساسيه حق اغلب اليهال ، و يتلف ، على حسب كلامهم ، كلش مو زين . الانواع الزينه ، هغييز و ليبيرو  Huggies Libero جربتهم ، أثنينهم زينين ، بس انا استقريت على ليبيرو على فكره ، اذا تبين تعرفين البيبي بلل حفاظته ، في خط اصفر من جدام ، يصير ازرق اذا مبلله  شفتوا التكنولوجيا  بالعذر بامبرز كله دعايات بالتلفزي

من افشل الأشياء اللي شريتها و لا عندي اثنين بعد  اللي تبي ، خل ادزلي ايميل و اعطيها اياه  الغلط إني شريته و انا حامل ، ما ادري شنو مقاسي اصلا ، خذيت سموول ، ما صك علي جان ارد اشتري ميديم ، يوم ولدت و لبسته ، لأ لأ مو من صجهم ، هذا الواحد اصلا شلون يقعد في؟!!! يابس ، و ما ينجفس يقولون بعد لبسي ثاني يوم عقب الولاده ، خرابيط ، الوحده يالله تعابل  بعمرها بعد الولاده،  وين لها خلق شي يصك عليها و يقمتها . أصلا أنا أول ايام ، كله نايمه مع نومة البيبي و اقعد ارضعه و ارد انام ، متى البسه ؟   ملاحظه : كاتبين لا تلبسينه و انت نايمه  لما سمعت تجارب رفيجاتي و قريت تعليقات البنات بالانستغرام، اكتشفت ان في ٣ انواع من البنات . النوع الأول اللي يؤمنون بالرداده الثاني الكورسي  و الثالث بالرياضه و الرضاعه، أنا طلعت من النوع الثالث ، ماني قادره استوعب ان هذا الشي برد جسمي ، اعذب روحي لابسته ليش ؟ اوكي يمكن يفيد ، بس أعتقد بدرجه بسيطه جدا أنا كلش مو مستعده أقعد مفقوصه طول اليوم ، عشان سانتي واحد، مو وقته ، هذا و انا صاحيه ما اقدر البسه ، هالمره و انا توني طالعه من ولاده ،

نكمل بوستات اكتشافات أغراض البيبي بيجامات اليهال حبيت ملوت نكست ، شريت كذا وحده قبل لا اولد على حسب اللي عجبني ، إللي ما انتبهت له إلا بعدين ، إن الافضل تكون البيجاما كلها طباقي من جدام ، توهقت بالبيجامات اللي صكتهم من وره ، صعبين حق تغيير الحفاضه ، او اللي تدخل من الراس ، الطباقي يكون بس من تحت ، صوب الحفاضه ، هذوله فاشلين ، يقعد يبجي سنه على ما تدخل   و الشي الثاني ، عشان البيبي ما يشمخ نفسه ، البيجاما فيها قماش ينجفس عشان يصك على اليد، أمي كانت ماخذه لي من مارك اند سبنسر ، طلعوا الكموم وايد قصار ، لما اصك ايد ولدي تنجفس من كثر ما الكم قصير ، ما عجبتني ، و صوب الرقبه الدلعه وايد كبيره مادري شلون قايله ، احنا بروح موت برد من المكيف .  هاذي اللي توهق بالنسبه للفنايل نصحوني رفيجاتي اخذهم من هوم سنتر ، قسم الاطفال (جونييرز)  اللي بالصوره فوق ، قالوا لي هذا الموديل احسن عشان اذا حاشها وصخ ، ما يحوش وجه البيبي وقت التغيير ، مو نفس الفنيله الكامله ، لانها لازم تطوف من الراس .  صح يمكن اول شهرين كانت مفيده ، لان

طبعا آنا توني أدري إن هدوم البيبي تنغسل بمسحوق غير إللي نستخدمه  فقالولي رفيجاتي  ، فليتي اهو حق البيبي استخدمته ، بس احس الهدوم صارت خشنه منه ، فخذيت السائل قلت يمكن الهدوم تطلع انعم ، ماكو فايده  بعدين بالصدفه شفت أكاونت بالانستغرام حاطه نوع ثاني ، اسمه بيوركس . و الكل بالتعليقات امدحه ، و لما جربته صج فرق ، الهدوم صاروا انعم  المشكله ما لقيته الا في جمعية العديليه

الحمد الله ولدت ، و عديت المرحله الصعبه ، ألحين صارلي تقريبا شهرين ، والكل يقولي شاركي الناس الأشياء اللي مريتي فيها و إللي شريتيها حق البيبي ، شنو الزين و الشين منها .  أنا أحس أغلب الناس تعرف بأغراض البيبي و شنو يحتاج، بس انا  إللي مصدومه من كل شي ، لأن آخر ياهل كان في عايلتنا عمره ألحين 11 سنه ، و رفيجاتي عيالهم كبار ، بالمتوسطه و الثانويه ، و أصلا ما عندي ياهل ، فما أثبت شنو يسولفون عنه البنات المهم ، نبدي بأول المشوار بالصدفه أول ما قلت حق رفيجتي  إني حامل ، قالت لي أهم شي تنزلين برنامج إسمه  My Pregnancy يقولج شنو تتوقيع من الحمال يوم بيوم ، و شنو تحتاجين و من صج البرنامج كان شي عجيب ، مطمن و مريح ، يعلمج بعد البيبي شلون قاعد يتكون طبعا انا من نزلت البرنامج قريت ال 9 أشهر كلها تقريبا كان كل أسبوع إييني مسج من البرنامج ، يقولي شنو حجم البيبي هذا الأسبيوع ، و يشبه حجم أي فاكهه يونس Click hear to download عرفت بعد إن في بالعربي بس مو برنامج بس بموقعهم Link