Day 7 - The Last Day: Our Hajj Trip

آخر يوم لرمي الجمرات ، هذا اليوم يكون وايد زحمة لدرجة إن الشيخ قبلها بيوم يقول لنا ، إللي يحس نفسه تعبان و ما يقدر يروح يخلي أحد ثاني يرمي بداله ... على طاري سالفة احد ثاني يروح يرمي ، لما قال لنا الشيخ عن آخر يوم للرمي كنا في الباص بالليل و كان يقول: يا جماعة إحنا ألحين في منى ، إذا فيكم شخص حاب يوكل أحد خل يقول من ألحين

و انا بقلبي: وييي ، عاد مين وين لنا فلوس ألحين عشان نوكل أحد

و بس طافت السالفة ليما ثاني يوم الصبح ، شفنا ابوي و قاعد يقول لنا:  تره اليوم بكون وايد زحمة ، مو نفس الايام إللي فاتت ، انا بوكل خالكم يروح بدالي يرمي

أنا (مره ثانية بقلبي عشان ما اتفشل) : آآآآآآآآه جذي نوكل ، و الله عبالي نوكل الفقاره بمنى و نعطيهم فلوس

المهم محد وكَل  و لا شرب أحد ، و كل العائلة راحت لمنى ، و صج زحمة ، وحر ، و الله يعافي الشايع عطتنا هل كبابيس الخضر ، صج فادتنا من أشعة الشمس

الله يهدي بس ، اكو أحد إييب ياهل بالحج؟؟ !!! مسكين

 رمينا جمراتنا و الأن العوده إلى الباصات

أهم شي كل واحد متقضب بالثاني ، يا ويلك إن هديتي المجموعة ، بس خلاص ضعتي

ركبنا الباص الساعة 2:00 الظهر ، ووصلنا الفندق على الـ 5:30 لأن حاشنا مطر و بردي بالطريق  بس الحمد الله كنا بالباص مو بره

و هذا الفيديو

الله يعافي الحملة قالوا لنا حطوا جناطكم جدام الغرف و بياخذونهم المطار قبل سفرتنا بيوم ، عشان ما نسحب معانا شي يوم السفر و مزهبين لنا البوردينغ

 ما بقى لنا الحين إلا طواف الوداع ، بس من التلفزيون مبين إن الواحد ما له محط ريل ، خافوا علينا نروح بالباصات و ما نرد إلى إلا ثاني يوم ، نفس ما صار فينا في عرفة ، فأغلب العوائل الكبيرة بالعدد ما راحت و دفعت هدي ، الشباب و القادر راحوا بروحهم ، بس قالوا زحمة و ما كان شي سهل . كل الحملات سمعنا قالوا إن السنة زحمة مو طبيعية 

و قبل لا نروح دورنا ننام قعدنا مع البنات إنتحنا

و بس في اليوم الثامن ، رحنا المطار و الحمد الله ما تأخرنا و لا حاشنا شي و ردينا ديرتنا

وبعد  أسبوعين تقريبا حملة الشايع سوت لنا إستقبال في بيتهم جمعت فيه كل الحاجات

 وايد حلو المكان

الرحلة كانت أسهل من ما توقعت

يمعة الأهل سهلتها و المجموعة إللي معانا كانت وايد حلوه

قالولي رفيجاتي لا تحاتين الحملة بتعلمج إتسوين كل شي و لا تخافين

و كانوا صاجين في كلامهم و أكثر من ما توقعت

كانوا يسهرون الليل ينطرونا  يمكن نبي شي ، خدمة 24 ساعة

أشكر إللي قصت شعرنا انملة

أشكر الإداريات و بناتهم إللي ما قعدوا على حيلهم بالباص يقدمون لنا البارد و الحار من المشروبات و المأكولات

عبالي بضعف بالحج ، ما صار

برد و عصير الكي دي دي الدائم في ديوانية النساء

و حلو الدايجستف الساخن و المحضر بأيدي بنات الشايع الصغار

وأشكر الطبيبة و الممرضة إليي عالجوا الدنيا كلها

 أشكر الشيخ نواف السالم إللي سهل علينا رحلة الباص الطويلة و امتعنا بالمسابقات  و المشاركات

و أشكر إللي ما ناموا في عرفة بس قاعدين يرتبون و يزهبون البوفيه و ينظفون

و الداعيات صبح و ليل يعلمونا عن الوضوء و الصلاة الصحيحة

و يا حلو المفاجأت بالدار لما نرد و الشهادات إلي إستلمناها

و البنات إلي في منى ، من تنظيف و ترتيب

و البرد إللي ما صدقت نزل واحد من الإداريين من الباص و يابلنا إياه من الجمعية مادري من وين

ما يمديك تشتهي شي إلا عندك ، شبيك لبيك حملة الشايع بين إيديك

و اخيرا الرجال خلف الكواليس إللي  سووا المستحيل لراحة الحجاج 

مشكورين كلكم