Day 4 & 5: Our Hajj Trip

من أصعب الأيام إللي مرت علينا يوم كنا في عرفات

طبعا محد نام بسرعة ، المكان مرتب و مافي شي ، بس لان كل الحاجات مع بعض جنا في معسكر فكان صعب الواحد بس يحط راسه و سيده ينام ، تقريبا الساعه 2:00 الفير أنا نمت بس ما مداني أصك عيني إلا أسمع أختي تناديني ميمي قومي صلي الفير

 توني نايمه متى أذن؟

بدون ما احس إلا صايره الساعه 5:00 الفير ، قمت غسلت صليت و رديت نمت ، ميته من التعب ، على الـ 10:00 الصبح قمت من الحر ، ليش طلعت الشمس صار وايد وايد حر ، إحنا بس مهافات و نقرأ قرآن

 الحملة كانت منبهتنا من قبل ، لحد يتأفف و لا يتذمر ، هذي من أصعب الأوقات و أثمنها ، هني إلى الله عز و جل يباهي ملائكته بحجاج يوم عرفه ، فلازم نكثر الدعاء و قراة القرآن

و الحمد الله هذا كله كان سهل ، صلينا الظهر و العصر جمع و قصر و بدينا الدعاء ليما الساعه 4:00 قالوا إتجهزوا الباصات بتمشي مبجر إلى المزدلفة ، أذكر ركبنا الباص الساعه 4:30 تقريبا و ما تحركنا إلا الساعة 8:00 من الزحمة و مشوا معانا باجي الباصات ، هني انا انام و أقعد أنام و أقعد لين صارت الساعة 10:00 و إحنا بعد ما وصلنا المزدلفة ، بعدين جان اكتشف في باصات طافت على طريق معين ووصلوا  و إحنا الشرطة ما رضوا لنا نطوف أو ودونا طريق ثاني ، ما وصلنا إلا يمكن على الساعه 11:30 أو 12 . بس هني ستوينا ، المغرب و العشاء ما صليناهم كله على بونه بنصلي بالمزدلفة لمه ننزل ، بس ماكو مكان ننزلة ، آخر شي صلينا بالشارع ، و قال لنا الشيخ الله يعطي العافية ، خلاص إحنا اتممنا المبيت في المزدلفة ، صج إن ما نزلنا من الباص ، بس إحنا في المزدلفة

ألحين بنروح الحرم عشان طواف الإفاضة ، شفتوا الجسر إلي بالصورة إللي تحت ؟

واقف ، هذا إلي بنروح منه ، بس دخت مره ثانية و نمت ، ما قعدت إلا أسمع صوت الشيخ يقول : يا جماعة الباص خترب

 هذا إختبار ، و ما لنا إلا الصبر ، الحمد لله أن خترب يم فندقنا مو مكان بعيد ، و كان في باص ثاني للحملة توهم مخلصين طوافهم ، خذينا باصهم و إتجهنا للحرم  

و إحنا بالطريج قال لنا الشيخ الباص بيوقف عند فندق الشهداء و هناك الحملة حجزت غرف - الله يعافيهم - عشان نتوضى فيها و نغسل ، لما نزلنا و دخلنا الفندق و له باص ثاني بعد متأخر مثلنا من نفس حملتنا ، واااي نضحك بسرعه بسرعه و رحنا الحرم

وصلنا هناك تقريبا الساعه 3:30 ، انا هني بس ، خقيت ، ماكو طاقة ، و ريلي شدت علي بعد ، قمت أعري ، واااي لأ ، ، بطيئة ، أبوي  يترجاني أقعد بكرسي و يدزوني عشان نخلص أسرع ، و انا مصممه أمشي ، اول حجة و على كرسي ، مستحيل ، أبي امشي بروحي

ما قدرت ، لما يا وقت السعي ، حدي 3 أشواط بعدين كرسي ، و يطييييير فيني 

تقريبا بـ 10 دقايق أنا مخلصه باجي  الـ 4 أشواط ، أهلي مساكين بعد باقيلهم شوطين 

على ما خلصوا ، إلا مأذن الفير ، كانت أظن 5:25 ، صلى فينا السديس

ألحين وقت العوده إلى الفندق ، نبي باص ألحين يردنا ، أبي أمشي لين الباص ، ما أقدر ، واي ضاق خلقي ، أمشي شوي و أقعد ، مو ماكله، فماكو طاقة ، صج كنت لازم أأكل لأعيش

الحمد الله وصلنا الباص و قعدنا ننطر باجي الناس على ما يوصلون ، جان يقولون في بعضهم بينطرون صلاة العيد ، بسسسسس ما وصلنا الفندق إلا الساعة 7:30 الصبح

هني أنا سيدة الفراش ، بس هااا ما خلص اليوم ، العصر بنروح منى

رادين جناطنا إلى الدار من الباص الخربان ، أغراض عرفات

و أخيرا و صلنااااااا

و هذي الأحداث بالفيديو